Takimi i datës 6 qershor për reformën në drejtësi, midis Ramës, Bashës dhe Vasilit nuk arriti të prodhonte një konsensus për miratimin e draftit final të Venecias, pavarësisht presionit të ndërkombëtarëve.
Në tavolinën e diskutimeve, kryeministri Rama pranoi kërkesën e opozitës për miratimin e reformës me një shumicë prej 2/3, por kërkesa për garantimin e kuotave të përfaqësimit në trupat e reja gjyqësore që do të përzgjidhen nga kjo reformë ndeshi në kundërshtinë e qeverisë shqiptare.

Kryeministri Rama pretendon se vendosja e kuotave është e barazvlefshme me vazhdimin e kapjes së drejtësisë, nga gjyqtarë potencialisht të korruptuar.

Nga ana e saj, përballë presionit publik dhe atij ndërkombëtar, Partia Demokratike i është referuar nenit 88 të draftit përfundimar të Komisionit në Drejtësi, si pika ku bazohet pretendimi i tyre për vendosjen e kuotave të përfaqësimit të opozitës.

Jafaktet analizon draftin përfundimtar, për të kuptuar nëse vendosja e kuotave është parashikuar nga ky Komision.

Konkretisht, Komisioni i Venecias i referohet pjesëmarrjes së opozitës në pikën e parë të nenit 88.

Ky nen, shprehimisht thotë:

88. Në pritje të miratimit të tekstit përfundimtar, Komisioni i Venecias rekomandon autoritetet shqiptare që të tregohen të vëmendshme ndaj disa çështjesh kryesore, si më poshtë:

88.1 – Nëse partitë politike nuk arrijnë në një konsensus për një shumicë të kualifikuar për zgjedhjen e anëtarëve të institucioneve të reja, ata mund të zgjedhin një sistem proporcional që garanton përfaqësimin e opozitës në trupat e reja që do të formohen, ose një model tjetër të përshtatshëm që do të siguronte një influence të caktuar të opozitës në procesin e përzgjedhjes.

Në rekomandimet e Venecias, në këtë nen nuk flitet për kuota si mekanizëm zhbllokues. Në vetvete, kuotat janë një deduksion i opozitës, i lindur nga kërkesa e Venecias për të garantuar përfaqësimin e opozitës në këtë proces.

Në këto kushte, dy pyetje kryesore duhet të marrin përgjigje nga aktorët e përfshirë?

E para, nëse kuotat janë një mekanizëm zhbllokues, sipas pretendimit të opozitës, përse Komisioni i Venecias nuk i është referuar në mënyrë eksplicite atyre? Për më tepër, cila është një kuotë e arsyeshme?

E dyta, a garanton formula aktuale e propozuar, ajo e 2/3, influencën e drejtëpërdrejtë të opozitës në procesin e përzgjedhjes?

Në mungesë të këtyre dy përgjigjeve, mbetet e qartë se kërkesa eksplicite për kuotat është një deduksion mbi atë që ka shkruar Venecia dhe jo një kërkesë e drejtëpërdrejtë e Komisionit të Venecias.