Në vitin 2015, Banka Botërore ka financuar Shqipërinë me rreth 525 milionë dollarë. Një vit më parë, kjo shumë ka qenë 305 milionë dollarë, ndërsa deri më 29 Shkurt 2016 shuma e financuar është 32.4 milionë dollarë. 

Diferencat në shumën e financuar mes vitit 2015 dhe vitit 2016 lidhet me 2 fakte:

1. Kuadri i Partneritetit ose Programi i ri 5-vjecarë 2015-2019 i Bankës Botërore me Shqipërinë, parashikon një financim deri në 1.2 miliardë dollarë për të mbështetur synimet e vendit për rritjen e qëndrueshme dhe integrimin europian. Arsyeja, se përse për vitin 2015 shuma e disbursuar është rreth 44% e totalit të parashikuar, shpjegohet në strategjinë e miratuar nga Banka Botërore ku thuhet:

“Për mbështetjen e programit të KPV-së VF15-vf19, propozohet financimi nga IBRD-ja prej 1,2 miliardë dollarësh amerikanë, me përdorim të konsiderueshëm në fazë fillestare..... deri në 40% e huadhënies pritet të marrë formën e mbështetjes buxhetore, me kusht që të ketë performancë të kënaqshme të kuadrit makrofiskal, për të cilin është rënë dakord. Për IBRD-në, viti fiskal 2015 shërben si periudhë lidhëse midis SPV-së së mëparshme dhe kësaj KPV-je.”

2. Ndërkohe, për vitin 2016, sipas të dhënave të Bankës Botërore, deri me 29 Shkurt janë disbursuar 32.4 milionë dollarë për 2 programe aktive të miratuara në vitin 2015. Në 9 muajt e ardhshëm pritet të aktivizohen programe të tjera ende në fazë shqyrtimi. Në dokumentin e Bankës Botërore thuhet shprehimisht se “numri i projekteve në vazhdim varion dhe brenda një viti financiar për shkak të miratimit dhe zbatimit relativisht të shpejtë të kredive për politikat e zhvillimit”. Gjithashtu, në këtë dokument thuhet se “programi indikativ i huadhënies së IBRD-së parashikon 15 projekte të reja, me mesataren prej tri projektesh të reja në vit”.