I njohur gjerësisht si ligji i dekriminalizimit, ligji 138/2015 u miratua me konsensus në Kuvend në datën 17 dhjetor 2015. 

Përpara se të miratohej, ligji u diskutua për disa muaj me radhë në Komisionin e Posaçëm Parlamentar, të kryesuar nga një deputet i Partisë Demokratike, z. Oerd Bylykbashi.

Në fillim të dhjetorit, kryetari i këtij Komisioni, z. Bylykbashi, në disa deklarata publike, si ajo e datës 3 dhjetor akuzoi qeverinë për vonimin e miratimit të draftit që ishte rënë dakord.

Amendamentet e propozuara në datën 25 shkurt nuk ishin paraqitur asnjëherë më parë gjatë procesit të diskutimit disa-mujor të ligjit në Komisionin Parlamentar.

Drafti i miratuar në 17 Dhjetor, me përjashtim të propozimit për detyrimin e kryerjes së një testi droge për funksionarët u miratua i plotë, me pëlqimin e të gjitha partive politike në vend.

Miratimi me konsensus i dekriminalizimit, sipas draftit të pëlqyer nga të gjitha palët u përshëndet nga partnerët ndërkombëtarë dhe konsiderohet nga Bashkimi Europian, nëpërmjet një reagimi zyrtar, si një hap i rëndësishëm përpara drejt hapjes së bisedimeve për anëtarësim.