Cilat ka qenë procedura e ndjekur për shitjen e INSIG-ut?

Në datën 1 shkurt 2016, Agjensia e Prokurimit Publik hapi zyrtarisht procedurat për shitjen 100% të aksioneve të “INSIG”, të zotëruara nga shteti. Hapja e procedurave u informua në buletinin numër 4 të Agjensisë së Prokurimit Publik, të datës 1 shkurt.

SHIH FAQET 323-324 TË DOKUMENTIT TË BASHKANGJITUR.

Cili ishte çmimi i përcaktuar nga shteti?

Për shitjen e 100% të aksioneve të “INSIG” u përcaktua vlera fillestare e 15,305,000 milionë euro, e konvertuar në Lekë sipas kursit të këmbimit të datës së publikimit të “Ftesës për Ofertë”, e datës 25.01.2016.

Cila ishte vlera reale e INSIG?

Pasi kompania ka njohur një rënie të vazhdueshme të përqindjes së tregut të zotëruar në Shqipëri, por edhe Kosovë e Maqedoni, INSIG u vlerësua në 2015-n nga ekspertët e fushës në 7 milionë euro.

Cilat ishin kriteret e vlerësimit të përcaktuar nga autoritetet?

Kriteret bazë të vlerësimit të ofertave u përcaktuan: 80 pikë çmimi më i lartë i ofruar; 10 pikë plani i biznesit dhe cilësia teknike e propozimit; si dhe 10 pikë cilësia e Investitorit (merr pikët maksimale kandidati i cili ka eksperiencë në tregun e sigurimeve dhe shtrirje rajonale/ ndërkombëtare).

SHIH BULETININ E APP-SË, FAQJA 270, E BULETINIT NR 5, 8 SHKURT 2016

Cilat ishin ofertat e paraqitura për privatizimin e INSIG-ut?

Për blerjen e INSIG u paraqitën katër oferta, nga të cilat tre kompani ose bashkim shoqërish shqiptare dhe një “joint-venture”, me kapital të huaj dhe shqiptar.

Ofertat e paraqitura ishin:

EUROSIG – 2,222,122,000 Lekë (rreth 15,9 milionë euro)

RECOVERED EARTH TECHNOLOGIES & DURAKU SHPK – 2,152,800,000 Lekë

BALFIN SHPK – 1,656,000,000 Lekë

KASTRATI DHE ALBSIG – 1,525,473,000

Kush rezultoi fitues?

Duke vlerësuar tre kriteret e vendosura për shpalljen e fituesit, oferta më e lartë, ajo e “EUROSIG” u vlerësua si oferta më e mirë. Vendimi u bë publik në VKM-në numër 43, të datës 23 mars 2016. Pika 1, e kësaj VKM përcakton:

Miratimin e procedurës së tenderimit për shitjen e paketës së aksioneve prej 100 për qind, të zotëruara nga shteti në shoqërinë “INSIG”, sh.a., Tiranë, dhe shpalljen fitues të tenderit shoqërinë “EUROSIG”, sh.a.

Përse privatizimi i INSIG u trajtua në mënyrë të thjeshtuar dhe jo sipas ligjit në fuqi për investimet strategjike?

INSIG sh.a. nuk gëzonte më statusin e ndërmarrjes së sektorit strategjik, sipas parashikimeve në ligjin nr.10166, datë 15.10.2009, “Për disa ndryshime në ligjin nr.8306, datë 14.3.1998, “Për strategjinë e privatizimit të sektorëve me rëndësi të veçantë”, të ndryshuar. Pas këtyre ndryshimeve, personi juridik INSIG, sh.a., në të cilin shteti gëzonte 100% të të drejtave si aksionar, nuk mund të trajtohej si privatizim strategjik për procesin e privatizimit, duke iu nënshtruar një procedure të thjeshtuar shitje.

Përse privatizimi i INSIG vjen vetëm në 2016-n, kur nëpërmjet një ligji, statusi i tij juridik u ndryshua që në 2009-n, duke thjeshtuar procedurat e privatizimit?

Sipas te dhënave të publikuara në mediat shqiptare, në vitin 2003, dy institucione ndërkombëtare BERZH (Banka Europiane për Rindërtim dhe Zhvillim) dhe IFC (Korporata Ndërkombëtare Financiare) u bënë partnerët e rinj të kompanisë shtetërore të sigurimeve, INSIG-ut, duke blerë 39% të aksioneve për rreth 10 milionë euro.

Vlera totale e kompanisë në atë kohë u llogarit në rreth 25 milionë euro, ndërsa pjesa e tregut, të operatorit të parë të sigurimeve në Shqipëri kishte zbritur nën 20%, pas liberalizimit dhe hyrjes së shoqërive të reja private.

Në vitin 2008, kompania amerikane Reserve Life Insurance, fitoi tenderin për shitjen e INSIG, duke ofruar 52.8 milionë dollarë. Shoqëria u tërhoq pas fillimit të krizës globale financiare. INSIG kishte në atë kohë 15% të tregut të sigurimeve.

Që prej vitit 2008, nuk ka pasur më procedura të tjera për shitjen e kompanisë, deri në hapjen e tenderit të suksesshëm në fillim të këtij viti.

Ndryshimi në vlerë përcaktohet nga fakti që nëse në 2010-n, INSIG ishte lider në tregun e sigurimeve në Shqipëri dhe zotëronte 25% të tregut në Kosovë, në 2016-n ai gëzon vetëm 6% të tregut shqiptar dhe vetëm 3-4% të tregut kosovar.